Il Premi Terzani 2024
Il Premi Terzani al è stât istituît intal 2004 de associazion culturâl vicino/lontano, in acuardi e in colaborazion cu la femine, Angela Terzani, e i fîs dal gjornalist e scritôr florentin Saskia e Folco.
In ocasion dal prin incuintri de jurie, ai 5 di Dicembar dal 2004 a Udin, il scritôr e reporter di vuere polac Ryszard Kapuściński, che vuê nol è plui, al pandè cun eficacie il sens di un premi dedicât ae figure di Terzani dentri dal progjet di vicino/lontano: «Il ricuart di Tiziano Terzani – al à dit Kapuściński – mi è tant cjâr. Il nestri mont, che a disin globalizât, al è fat invezit di tantis provinciis, di tantis culturis diviersis. Tiziano Terzani cul so lavôr di gjornalist al à savût pardabon creâ chel puint tra lis diversitâts e lis diferencis che al permet ancje a chei altris di capî il mont, un mont che al cambie cun rapiditât e in maniere dramatiche. Tiziano Terzani lu à podût fâ parcè che al saveve cjalâ, i siei voi a savevin cjalâ intal mût just. E par chest Tiziano Terzani al è stât un vêr e impuartant testemoni dal nestri timp. In tancj a scrivin. Vuê o sin somerzûts di un diluvi di peraulis, ma pôc di chel che al ven scrit al restarà».
Ae presidence de jurie dal Premi e je, fin de prime edizion, Angela Terzani, garante – cu la associazion vicino/lontano – de indipendence dal ricognossiment.
Il Premi Terzani al ven consegnât ogni an a Udin dilunc dal festival vicino/lontano.
A vuê a fasin part de Jurie dal Premi: Enza Campino, Toni Capuozzo, Marco Del Corona, Andrea Filippi, Milena Gabanelli, Nicola Gasbarro, Carla Nicolini, Marco Pacini, Paolo Pecile, Remo Politeo, Marino Sinibaldi, Mario Soldaini.
Traduzion par cure de ARLeF
La vincitrice: Sally Hayden
Menzione d'onore: Ai Weiwei
Premi leterari 2024: i cinc finaliscj
Ai Weiwei par “Mille anni di gioie e dolori” (Feltrinelli), Sally Hayden par “E la quarta volta siamo annegati” (Bollati Boringhieri), Benjamín Labatut par “Maniac” (Adelphi), Leila Mottley par “Passeggiare la notte” (Bollati Boringhieri) e Damir Ovčina par “Preghiera nell’assedio” (Keller) a son i cinc finaliscj de edizion numar 20 dal Premi leterari internazionâl Tiziano Terzani, un ricognossiment che la associazion culturâl vicino/lontano di Udin e à istituît e promovût adun cu la famee Terzani, par ricuardâ il gjornalist e scritôr florentin. Lu à comunicât la jurie, che si è dade dongje a Florence. «Se no insistìn tal pretindi che ducj a vedin dirit ae informazion e ae espression libare dal pinsîr, o riscjìn di pierdilu e al è cussì che la democrazie e sparìs. Ancjemò une volte, dopo vincj agns – e declare Angela Terzani -, la jurie e à volût onorâ chest messaç di Tiziano, selezionant cinc volums finaliscj che nus judin a capî miôr lis tragjediis coletivis dal nestri timp, situazions che nus fasin stâ in pinsîr e che a conturbin la nestre vision dal avignî: la vuere inmò une volte cussì dongje e spaventose, la catastrofe umanitarie dai migrants te indiference dal mont e di cui che al à za dut e forsit masse, regjims opressîfs che a dinein la libertât e i dirits elementârs che si rinfuarcissin, la margjinalitât estreme des personis plui debilis e cence difesis, e po lis promessis ma ancje lis incognitis de inteligjence artificiâl». I components de jurie – Enza Campino, Toni Capuozzo, Marco Del Corona, Andrea Filippi, Milena Gabanelli, Nicola Gasbarro, Carla Nicolini, Marco Pacini, Paolo Pecile, Remo Politeo, Marino Sinibaldi, Mario Soldaini – si son cjapâts un pôc di timp in plui par rifleti prin di lâ indenant cu la votazion finâl. Il vincidôr, o la vincidore, a saran anunziâts tor la metât di Avrîl. Sabide ai 11 di Mai, invezit, aes 21 tal Teatri Gnûf Giovanni da Udine, a vincj agns de muart di Tiziano Terzani e de istituzion dal Premi, il vincidôr o la vincidore a saran i protagoniscj de serade event là che si consegnarà il ricognossiment, che al sarà l’apontament centrâl de edizion numar 20 dal Festival vicino/lontano, in program a Udin dai 7 ai 12 di Mai.
