Ai Weiwei par “Mille anni di gioie e dolori” (Feltrinelli), Sally Hayden par “E la quarta volta siamo annegati” (Bollati Boringhieri), Benjamín Labatut par “Maniac” (Adelphi), Leila Mottley par “Passeggiare la notte” (Bollati Boringhieri) e Damir Ovčina par “Preghiera nell’assedio” (Keller) a son i cinc finaliscj de edizion numar 20 dal Premi leterari internazionâl Tiziano Terzani, un ricognossiment che la associazion culturâl vicino/lontano di Udin e à istituît e promovût adun cu la famee Terzani, par ricuardâ il gjornalist e scritôr florentin. Lu à comunicât la jurie, che si è dade dongje a Florence. «Se no insistìn tal pretindi che ducj a vedin dirit ae informazion e ae espression libare dal pinsîr, o riscjìn di pierdilu e al è cussì che la democrazie e sparìs. Ancjemò une volte, dopo vincj agns – e declare Angela Terzani -, la jurie e à volût onorâ chest messaç di Tiziano, selezionant cinc volums finaliscj che nus judin a capî miôr lis tragjediis coletivis dal nestri timp, situazions che nus fasin stâ in pinsîr e che a conturbin la nestre vision dal avignî: la vuere inmò une volte cussì dongje e spaventose, la catastrofe umanitarie dai migrants te indiference dal mont e di cui che al à za dut e forsit masse, regjims opressîfs che a dinein la libertât e i dirits elementârs che si rinfuarcissin, la margjinalitât estreme des personis plui debilis e cence difesis, e po lis promessis ma ancje lis incognitis de inteligjence artificiâl». I components de jurie – Enza Campino, Toni Capuozzo, Marco Del Corona, Andrea Filippi, Milena Gabanelli, Nicola Gasbarro, Carla Nicolini, Marco Pacini, Paolo Pecile, Remo Politeo, Marino Sinibaldi, Mario Soldaini – si son cjapâts un pôc di timp in plui par rifleti prin di lâ indenant cu la votazion finâl. Il vincidôr, o la vincidore, a saran anunziâts tor la metât di Avrîl. Sabide ai 11 di Mai, invezit, aes 21 tal Teatri Gnûf Giovanni da Udine, a vincj agns de muart di Tiziano Terzani e de istituzion dal Premi, il vincidôr o la vincidore a saran i protagoniscj de serade event là che si consegnarà il ricognossiment, che al sarà l’apontament centrâl de edizion numar 20 dal Festival vicino/lontano, in program a Udin dai 7 ai 12 di Mai.